Dwarna

Is-Sur Oliver Scicluna huwa l-Kap Eżekuttiv ta’ Aġenzija Sapport. Huwa twieled fl-14 ta’ Lulju 1986 bi Spina Bifida, kundizzjoni li taffettwa l-mobilità fost oħrajn.

Oliver irċieva l-edukazzjoni primarja tiegħu fl-Iskola Primarja tal-Kalkara u kompla l-edukazzjoni sekondarja tiegħu fil-Kulleġġ De La Salle, filwaqt li kompla l-edukazzjoni postsekondarja tiegħu fl-MCAST, u l-edukazzjoni terzjarja fl-Università ta’ Malta u l-Università ta’ Chester. Huwa ggradwa fl-informatika, l-istudji dwar iż-żgħażagħ u l-amministrazzjoni pubblika.

Oliver mexxa għadd ta’ organizzazzjonijiet volontarji inkluż Breaking Limits, organizzazzjoni li kienet attivista fis-settur tad-diżabilità.

Fl-2014, Oliver beda jservi fi ħdan il-Kummissjoni għad-Drittijiet tal-Persuni b’Diżabilità (CRPD) bħala Chairperson u eventwalment bħala Kummissarju wara li ħadem u ppropona strutturi u leġiżlazzjonijiet aktar b’saħħithom għad-drittijiet tal-persuni b’diżabilità.

Fi ħdan ir-rwol tiegħu bħala Kummissarju, Oliver waqqaf il-Malta Business Disability Forum, pjattaforma li tiġbor flimkien is-settur tan-negozju u l-organizzazzjonijiet tad-diżabilità, l-Assoċjazzjoni għall-Kunsilli Lokali u l-Kummissarju għas-Saħħa Mentali, u b’hekk inħolqot pjattaforma għal djalogu miftuħ u kostruttiv bejn il-partijiet kollha.

Oliver serva wkoll f’diversi Bordijiet fi ħdan entitajiet differenti fosthom Transport Malta, Valletta18, NCPE, Jobs+, Malta Community Chest Fund, FITA, u Public Broadcasting Services.

Huwa ġie wkoll maħtur permezz ta’ co-option fil-Parlament Malti u serva bħala Membru Parlamentari minn Jannar 2021 sa Frar 2022.

Glenda Curmi hija d-Direttur tal-Client Multi-Disciplinary Support ta’ Aġenzija Sapport. Hija tħarrġet bħala Ħaddiema Soċjali u riċentement kisbet Master of Science in Management. Bdiet il-karriera tagħha fi ħdan Aġenzija Appoġġ fit-tim tal-Foster Care fl-2005, fejn mexxiet is-servizz High Support Services u għadd ta’ servizzi oħra għal aktar minn disa’ snin, inklużi s-Siblings Community Home, is-Servizzi Residenzjali, u s-Servizzi tas-Saħħa. Glenda ħadmet ukoll għal aktar minn sitt snin f’servizzi ta’ kenn għall-vittmi ta’ vjolenza domestika u s-Servizzi tal-Qorti, inklużi ż-Żjarat ta’ Aċċess b’Superviżjoni.

Fl-2019, Glenda ngħaqdet ma’ Aġenzija Sapport bħala maniġer u mexxiet it-Tim Komunitarju u t-Tim tal-Ħidma Soċjali. Issa hija d-Direttriċi tal-Client Multi-Disciplinary Support li jinkludi s-servizzi tal-Komunità, tal-Għajxien Indipendenti fil-Komunità (ICL), Occupational Therapy, Way to Work, Family Unit u t-Tim ta’ Sharing Lives. Hija taħdem b’mod attiv għall-inklużjoni fil-komunità ta’ persuni b’diżabilità u temmen ħafna fil-kapaċità li jintlaħaq għan meta jkun hemm ir-rieda.

Melanie kienet involuta fit-twaqqif, l-istrutturar u l-operat tas-Segretarjat Parlamentari għad-Drittijiet tal-Persuni b’Diżabilità u Anzjanità Attiva (PSDAA), maħluq għall-ewwel darba f’Malta fl-2013. Fl-istess sena nħatret ukoll bħala membru tal-kunsill tal-Kummissjoni għad-Drittijiet tal-Persuni b’Diżabilità. Melanie kienet involuta wkoll fit-tfassil ta’ strutturi bħal Proġett Soċjetà Ġusta, il-Focal Point Office, il-Kumitat Soċjetà Ġusta li huwa mekkaniżmu konsultattiv għas-settur tad-diżabilità, u fil-formulazzjoni tal-bażi għall-ewwel Strateġija Nazzjonali dwar id-Diżabilità ta’ Malta. Hija kienet involuta wkoll fl-ippjanar u t-teħid ta’ deċiżjonijiet ta’ Aġenzija Sapport biex issir aġenzija awtonoma fl-2016.

Melanie kienet involuta fil-ħolqien tal-Premju Soċjetà Ġusta u d-database nazzjonali għal persuni b’diżabilità, bl-għan aħħari li tittieħed stampa ċara tal-bżonnijiet tal-persuni b’diżabilità u l-iżvilupp u l-provedimenti tas-servizzi meħtieġa. Proġett ieħorli kienet involuta fih hu taħriġ għal persuni involuti fis-setturi tad-diżabilità u l-anzjanità, li joffri korsijiet ta’ taħriġ speċjalizzat li jorbot mal-għanijiet tal-Istrateġija Ewropea dwar id-Diżabilità 2010-2020.

Melanie kienet involuta u mexxiet diversi servizzi innovattivi fi ħdan is-settur tad-diżabilità inkluż iċ-Ċentru ta’ Matul il-Jum Skills Space tal-Aġenzija f’Tas-Sliema, l-ewwel Helpline nazzjonali għall-persuni b’diżabilità, il-Kumitat Konsultattiv ta’ Aġenzija Sapport, u l-programm Narċis.

Maria Cynthia DeBono hija d-Direttur ta’ Supported Independent Living fi ħdan Aġenzija Sapport. Hija ggradwat mill-Università ta’ Malta fl-2007 bħala fiżjoterapista u sal-2019 ħadmet f’diversi spartijiet u servizzi residenzjali għal klijenti ta’ kull età, inkluż l-Isptar ta’ Riabilitazzjoni Karin Grech, is-CDAU, l-Isptar Mater Dei u fil-Faċilita’ għall-Kura fit-Tul San Vinċenz de Paul.

Hi studjat Masters fl-Istudji dwar id-Diżabilità fl-Università ta’ Malta u ggradwat fl-2015.

Fl-2019, Maria Cynthia ngħaqdet ma’ Aġenzija Sapport bħala Manager tas-Servizzi ta’ Matul il-Jum. Hija ħadmet ukoll fuq diversi kollaborazzjonijiet ma’ entitajiet differenti biex il-klijenti jingħataw opportunitajiet biex jiksbu ħiliet ġodda u jkunu involuti fil-komunità bħala ċittadini attivi. Mill-2023, hija bdiet taqdi r-rwol ta’ Direttur tas-Supported Independent Living. Dan id-direttorat jinkludi s-servizzi residenzjali, is-servizzi tal-organizzazzjonijiet nongovernattivi, is-Sonia Tanti Independent Living Centre, l-Access to Communication & Technology Unit, is-servizz ta’ Interpretazzjoni tal-Lingwa tas-Sinjali, kif ukoll it-Tim ta’ Professional Advisory and Prevention.

Maria Cynthia ilha wkoll membru attiv tal-bord tal-Empowerment Scheme mill-2015 u fl-2022 inħatret bħala President ta’ dan il-bord. Inħatret ukoll bħala membru tal-Bord Interministerjali u Interdixxiplinari għall-Persuni b’Diżabilità (IIPBD) fl-2020, pożizzjoni li għadha tokkupa.

Hija tqis lilha nnifisha bħala persuna motivata ħafna u tibqa’ ħerqana biex tikseb għarfien ġdid u taqsmu ma’ ħaddieħor. Hija temmen bi sħiħ li l-persuna b’diżabilità taf l-aktar u li l-professjonisti għandhom ikunu faċilitaturi fil-ħajja tal-persuna b’diżabilità.

Chiara ngħaqdet mal-Aġenzija fl-2016. Hija għandha 20 sena ta’ esperjenza fir-riżorsi umani, fl-amministrazzjoni u fir-riċerka fi ħdan l-Amministrazzjoni Pubblika ta’ Malta u qabel ma ngħaqdet ma’ Aġenzija Sapport, hija mexxiet id-Direttorat tal-Immaniġġjar tar-Riżorsi Umani fi ħdan il-Ministeru għall-Politika Soċjali għal sitt snin. L-esperjenza tax-xogħol tagħha tinkludi r-reklutaġġ, it-taħriġ, l-immaniġjar tal-prestazzjoni, ir-relazzjonijiet mal-impjegati, l-ugwaljanza u l-benesseri tal-impjegati. Hija kellha wkoll pożizzjonijiet relatati mar-riċerka u r-regolament tal-politika soċjali.

Chiara hija mħarrġa bħala psikologa okkupazzjonali bil-warrant u għandha Grad ta’ Baċellerat b’Unuri fil-Psikoloġija mill-Università ta’ Malta u MSc fil-Psikoloġija Okkupazzjonali minn Birkbeck College, l-Università ta’ Londra.

Is-Sinjura Alison Attard hija mħarrġa bħala accountant u għandha kwalifika internazzjonali mill-Association of Certified Chartered Accountants u MBA minn Heriot Watt University. Hija għandha warrant ta’ Accountant Pubbliku.
Il-karriera u l-esperjenza tagħha fis-settur tal-finanzi evolvew matul dawn l-aħħar tletin sena permezz ta’ impjieg kemm fis-settur pubbliku kif ukoll f’dak privat. Qabel ma ngħaqdet ma’ Aġenzija Sapport, hija kellha l-kariga ta’ Head of Business Support fis-settur pubbliku, responsabbli għall-finanzi, l-iżvilupp tar-riżorsi umani u tal-organizzazzjoni, it-teknoloġija tal-informazzjoni, l-akkwist, il-komunikazzjoni u s-servizzi korporattivi.

Is-Sinjura Attard kienet ukoll involuta ma’ entità pubblika oħra għal erbatax-il sena fejn avvanzat f’diversi rwoli fid-dipartimenti Amministrattivi u Finanzjarji, u kellha l-kariga ta’ Maniġer Kummerċjali fuq żewġ kuntratti pubbliċi lokali ewlenin tal-kostruzzjoni u aktar tard inħatret bħala Kontrollur Finanzjarju, primarjament responsabbli għall- Finance & Procurement Unit kif ukoll għall-finanzjament u kuntratti assoċjati mal-proġetti kapitali fil-qasam tas-saħħa.

Is-Sinjura Attard serviet fuq bosta bordijiet u kumitati għall-intervisti u l-aġġudikazzjoni kif ukoll f’bordijiet ta’ kumpaniji kummerċjali u Kumitati tal-Awditjar.

Hija Fellow tal-Association of Certified Chartered Accountants u l-Malta Institute of Accountants.

Matthew Zarb huwa d-Direttur tad-Dipartiment tal-Administration & EU Funds fi ħdan Aġenzija Sapport.

Wara l-Baċċellerat Internazzjonali tiegħu fil-United World College of the Adriatic (l-Italja), Matthew kompla jistudja l-Liġi fl-Università ta’ Malta. Il-karriera tiegħu bdiet bħala l-Koordinatur tal-Proġetti mal-NCPE (il-Kummissjoni Nazzjonali għall-Promozzjoni tal-Ugwaljanza) bil-proġetti “Strengthening Equality Beyond Legislation” u “Gender Mainstreaming in Practice”. Wara, huwa ħa r-rwol ta’ Maniġer fid-Diviżjoni tal-Fondi u l-Programmi b’attenzjoni speċifika fuq il-finanzjament tal-Erasmus+.

Sal-2016 hu kellu r-rwol ta’ Senior Manager fi ħdan il-Ministeru għall-Edukazzjoni u l-Impjiegi u assista fl-implimentazzjoni tal-proġett Invest – proġett li kellu l-għan li jmexxi l-programm ‘My Journey ’, li ra l-integrazzjoni tal-ETV fi ħdan l-edukazzjoni sekondarja. Fl-2018 Matthew inħatar bħala Assistent Direttur fl-istess dipartiment, qabel ma kiseb il-kariga ta’ Direttur f’Aġenzija Sapport, fejn jara l-ħtiġijiet tal-Aġenzija fir-rigward ta’ amministrazzjoni u fondi tal-UE.

Matthew ilu scout attiv mas-St. Aloysius’ Scout group mill-2007 u kellu ħafna rwoli attivi f’NGOs u organizzazzjonijiet tal-istudenti bħall-AIESEC. Huwa għandu attitudni pożittiva u jemmen fil-kapaċitajiet tiegħu, u dan jixraq ħafna lill-istrateġija ta’ Aġenzija Sapport li tħares dejjem ‘il quddiem.