My Programme

My Programme joffri sapport ibbażat fil-komunità lill-persuni b’diżabilità u lill-familji tagħhom f’Malta u Għawdex. L-għan ġenerali tas-servizz hu li jassisti lill-persuni b’diżabilità biex dawn jgħixu ħajja indipendenti fil-komunità, filwaqt li jtejjeb il-kwalità tal-ħajja kemm tal-klijent kif ukoll tal-kuraturi tiegħu. Joffri programm immirat lejn ix-xewqat u l-bżonnijiet tal-individwu skont l-abilitajiet u l-limitazzjonijiet tagħhom, wara pjan ta’ assessjar u ta’ interventi li jitwettaq qabel ma jibda s-servizz.

Is-servizz jista’ jinkludi interventi mmirati lejn:

• it-titjib tal-kura tal-persuna
• l-assistenza fit-tagħlim u fil-parteċipazzjoni fil-ħiliet taż-żamma tad-dar nadifa u f’kundizzjoni tajba
• il-parteċipazzjoni fil-komunità u l-ħiliet soċjali
• involvement f’interventi fi gruppi
• il-prevenzjoni u l-immaniġġjar ta’ mġiba preokkupanti wara interventi ta’ mġiba pożittiva

Il-professjonisti flimkien mal-klijent joħolqu pjan personalizzat. Dan il-pjan ikun jinkudi medda speċifika ta’ żmien għal kull mira li tkun ġiet issettjata li tintlaħaq. Dan il-programm imbagħad jiġi segwit kemm mill-klijent kif ukoll mis-Support Worker meta jkunu qed isiru l-interventi. Dan il-pjan jiġi rivedut flimkien mal-klijent sabiex ikunu aġġornati l-miri.

________________

My Programme huwa servizz li ġie aġġornat, minn dak li kien magħruf bħala s-Servizz fil-Komunità. Is-Servizz fil-Komunità ta’ Aġenzija Sapport rebaħ il-Premju għall-Eċċellenza tas-Servizzi Soċjali Ewropej 2021 min-Network Soċjali Ewropew.

My Programme jiġi offrut lill-individwi li jkunu qed jiġu segwiti minn Ħaddiema Soċjali ta’ Aġenzija Sapport. L-individwi eliġibbli għal dan is-servizz huma dawk bi problemi soċjali, li jeħtieġ li jiġu segwiti mill-qrib waqt li jtejbu l-ħiliet tagħhom jew jitgħallmu oħrajn ġodda, sabiex ikunu jistgħu jipparteċipaw u jgħixu ħajja indipendenti fil-komunità.

My Programme huma aċċessibbli għal kwalunkwe individwu b’diżabilità taħt l-età ta’ 60 sena, u mhux ristrett għal xi tip ta’ diżabilità. Is-servizz isegwi l-kriterji t’hawn taħt:

• Tingħata prijorità lill-individwi li jinsabu f’riskju kbir li jiddaħħlu f’xi istituzzjoni, jew li għandhom bżonn kbir ta’ sapport. Dan jinkludi individwi li jużaw siġġu tar-roti u li bħalissa għandhom aċċessibbilità limitati ħafna. L-iskop ewlieni ta’ dan hu sabiex, kemm jista’ jkun, l-individwi ma jiġux iżolati soċjalment.

• Ikun ġie evalwat li l-klijent u/jew il-familja prospettivi jeħtieġu monitoraġġ għall-prevenzjoni u aktar protezzjoni minħabba fatturi ta’ riskju allarmanti fis-sitwazzjoni preżenti tagħhom.

• Il-persuna b’diżabilità, il-familja tagħha, u/jew dawk li jipprovdu s-servizz huma lesti li jipparteċipaw fl-Individual Support Plan u fil-proċess tal-Person-Centred Planning għal intervent fil-ħiliet tal-ħajja ta’ kuljum. Din il-persuna, il-familja tagħha, u/jew dawk li jipprovdu s-servizz huma involuti kif meħtieġ mis-servizz partikolari.

It-tim tal-Intake li jirċievi l-każijiet ġodda jipproċessa l-każijiet kollha li jaslu minn servizzi prospettivi, il-familji u professjonisti oħra li jeħtieġu kwalunkwe servizz fl-Aġenzija. Il-każijiet kollha li jidħlu jiġu assessjati bir-reqqa mill-mexxejja tat-tim, li jidentifikaw liema servizz/i l-individwu jista’ jibbenifika minnu skont il-bżonnijiet, interessi u x-xewqat tal-individwu.

Wara dan l-assessjar, it-tim jikkoordina kif xieraq mal-professjonisti mid-dipartimenti tas-servizzi identifikati, u jwettaq pjanijiet ta’ azzjoni ta’ segwitu. F’każ fejn hemm il-ħtieġa għal My Programme, it-tim tal-Intake jikkollabora mat-tim tas-Servizzi ta’ Ħidma Socjali għal aktar assessjar. Jekk il-Ħaddiem Soċjali, mill-assessjar professjonali tiegħu/tagħha, jikkonkludi li l-familja u/jew l-individwu jaqgħu taħt il-kriterji ta’ eliġibilità, il-każ jiġi diskuss mal-professjonisti tal-My Programme.

Wara li l-klijent jiġi referut lejn il-My Programme, iż-żewġ timijiet jiddiskutu kull aspett loġistiku ieħor li jeħtieġ li jiġi kkunsidrat il-pjan ta’ sapport tal-individwu, sabiex jittejbu l-kwalità tal-ħajja u l-indipendenza tal-klijent.

Agħfas fuq din il-ħolqa għall-Mistoqsijiet Frekwenti (FAQs) dwar dan is-servizz.