SkillUp

Bi pjaċir inħabbru li t-Taqsima SkillUp fi ħdan Aġenzija Sapport ġiet nnominat bħala finalista fil-kategorija Disability and Accessibility in Social Services tal-European Social Services Awards 2026, organizzata mill-ESN.

It-Taqsima SkillUp ġiet rikonixxuta għas-sehem tagħha fejn tħejji individwi b’ħiliet essenzjali tal-ħajja u tad-dinja tax-xogħol, waqt li tagħti sostenn għall-parteċipazzjoni attiva fil-komunità tagħhom.

Issa f’idejn il-pubbliku: il-votazzjoni miftuħa mit-30 ta’ Settembru sas-26 ta’ Ottubru, u kull vot jgħin sabiex inkomplu nagħtu r-rikonoxximent mistħoqq lix-xogħol u lill-persuni li tassisti.

Ivvota għalina mis-sit uffiċċjali, u nħeġġuk tqassam din l-informazzjoni sabiex tgħinna nxerrdu l-kelma.

Segwi l-passi li jmiss biex tivvota:

1. Agħfas din il-ħolqa tas-sit eletroniku tal-European Social Services Awards
2. Ikteb l-indirizz tal-email tiegħek
3. Immarka l-kaxxa tal-kunsens
4. Agħfas Verify
5. Ser tirċievi email. Minn din l-email agħfas here
6. Ser tinfetaħ paġna ġdida
7. Niżżel sa ma ssib Category 8: Disability and Accessibility in Social Services Award u agħżel SkillUp – Supporting Persons with Disabilities to Live Independently
8. Agħfas Lock in Vote

Persuna tista’ tivvota darba biss.

Votazzjoni miftuħa sas-26 ta’ Ottubru 2026.

(SkillUp ġie nnominat ukoll fil-kategorija Headline Jury Award for Social Inclusion. Din il-kategorija mhix miftuħa għal-votazzjoni pubblika.)

Ir-rebbieħa jitħabbru waqt iċ-ċerimonja tal-European Social Services Awards fid-19 ta’ Novembru f’Ruma, l-Italja.

It-Taqsima SkillUp toffri programmi maħsuba biex jappoġġjaw persuni b’diżabilita, bl-għan li jtejbu l-kwalita tal-ħajja tagħhom u jippromwovu l-inklużjoni tagħhom fl-aspetti kollha tas-soċjeta.

It-Taqsima SkillUp hija mibnija fuq erba’ pilastri ewlenin, li jiffurmaw il-pedament għal mod komprensiv fl-għoti ta’ sostenn fis-settur tad-diżabilita. Dawn il-pilastri jiżguraw li persuni b’diżabilita jirċievu l-assistenza u r-riżorsi meħtieġa biex jiksbu aktar indipendenza, parteċipazzjoni attiva, u benesseri ġenerali.

Assessjar

Qabel ma jirreġistraw għal kwalunkwe programm, persuni b’diżabilita jgħaddu minn proċess li jinkludi assessjar, laqgħa separata mal-ġenituri / gwardjani, u perjodu ta’ prova. Dan il-perjodu huwa importanti biex issir evalwazzjoni fuq il-kapaċitajiet funzjonali, l-istili ta’ tagħlim, il-ħiliet soċjali, ir-reazzjonijiet emozzjonali u ta’ mġiba, l-indipendenza, u fatturi oħra. L-għan huwa li tiġi ddeterminata l-eliġibilita tal-individwu u jiġi identifikat l-aktar programm adattat għall-bżonnijiet tiegħu.

Agħfas din il-ħolqa għal fuljett ta’ informazzjoni dwar SkillUp

Agħfas fuq din il-ħolqa għall-Mistoqsijiet Frekwenti (FAQs) dwar dan is-servizz

Il-Programm Way to Work huwa mfassal biex jgħin lill-persuni b’diżabilita jippreparaw aħjar għal ħiliet relatati mal-impjieg. Dan il-programm komprensiv jgħaqqad sessjonijiet informattivi fi grupp u taħriġ prattiku biex itejjeb il-ħiliet tal-parteċipanti għall-impjegabilita.

Il-komponenti ewlenin tal-programm jinkludu:

• kitba ta’ CV u ħiliet fl-applikazzjoni għal impjieg
• tekniki ta’ tiftix ta’ impjieg
• taħriġ fl-użu tal-karozza tal-linja (biex jassisti fl-ivvjaġġar lejn u mix-xogħol)
• immaniġġjar tal-finanzi (immaniġġjar tal-flus: tqassim tal-flus u mmaniġġjar tal-pagi)
• immaniġġjar tal-ħin

Il-parteċipanti jieħdu sehem ukoll f’taħriġ prattiku f’opportunitajiet ta’ impjieg, jesploraw diversi għażliet ta’ impjieg, u jiġu esposti direttament permezz ta’ żjarat fuq postijiet tax-xogħol differenti, li jgħinuhom jifhmu l-għażliet diversi tal-karrieri disponibbli.

Tul ta’ żmien

Sitt xhur – Taħriġ fi grupp

Eliġibilità

Persuni b’diżabilita li:

• għandhom bejn is-16 u l-40 sena (il-persuna tista’ tiġi riferuta sa sitt xhur qabel ma tagħlaq 16-il sena).
• qed jirċievu biss l-Assistenza għal Diżabilita jew l-Assistenza għal Diżabilita Severa mis-Sigurta Soċjali (persuni li jirċievu l-Assistenza Miżjuda għal Diżabilita Severa mhumiex eliġibbli biex japplikaw għal dan il-programm).
• għandhom il-potenzjal li jfittxu impjieg u li jsiru impjegati.
• ikunu disponibbli biex jattendu l-programm erba’ darbiet fil-ġimgħa filgħodu.

________________

• Il-Programm Way to Work ġie ppremjat fit-tielet post fil-kategorija Best Non-formal and Community Learning for Adults Award tal-EPALE Awards 2025.

• Il-Programm Way to Work kien magħżul għas-Sejħa għal Nominazzjonijiet 2024 taz-Zero Project!

Il-Programm Self-Skills jipprovdi appoġġ personalizzat lil persuni b’diżabilita li qed ifittxu li jiżviluppaw ħiliet essenzjali tal-ħajja. Permezz ta’ sessjonijiet ta’ taħriġ fuq bażi individwali, il-parteċipanti jirċievu gwida mfassla apposta biex tilħaq il-bżonnijiet speċifiċi u l-għanijiet personali tagħhom. It-tul tal-programm huwa flessibbli, li jvarja minn minimu ta’ xahar sa massimu ta’ sitt xhur, skont il-progress u r-rekwiżiti tal-individwu.

Tul ta’ żmien

Xahar sa sitt xhur – Sessjonijiet individwali

Eliġibilità

Persuni b’diżabilita li:

• għandhom bejn is-16 u l-50 sena (il-persuna tista’ tiġi riferuta sa sitt xhur qabel ma tagħlaq 16-il sena).
• qed jirċievu kwalunkwe forma ta’ Assistenza għal Diżabilita mis-Sigurta Soċjali.
• ma jkunux qed jattendu ċentru fi ħdan is-Servizzi ta’ Matul il-Jum.

Il-Programm Skills4Life huwa mħejji bl-għan għal żvilupp ta’ ħiliet essenzjali tal-ħajja biex jgħinu lill-parteċipanti jgħixu b’mod aktar indipendenti. Permezz ta’ taħriġ prattiku u workshops, il-parteċipanti jtejbu l-ħiliet personali bħal:

• komunikazzjoni
• ħiliet tat-tisjir
• xogħol domestiku
• iġjene personali
• kif tibni relazzjonijiet, limiti u rispetti lejk innifsek
• immaniġġjar tal-flus u tal-ħin

Dawn il-ħiliet huma vitali għall-ħajja ta’ kuljum u għandhom l-għan li jrawmu aktar indipendenza u kunfidenza fl-attivitajiet ta’ kuljum.

Tul ta’ żmien

Tlett Xhur – Taħriġ fi grupp

Eliġibilità

Persuni b’diżabilita li:

• għandhom bejn is-16 u l-50 sena (il-persuna tista’ tiġi riferuta sa sitt xhur qabel ma tagħlaq 16-il sena).
• jista’ jkun li qed jirċievu kwalunkwe forma ta’ Assistenza għal Diżabilita mis-Sigurta Soċjali.
• huma disponibbli biex jattendu l-programm erba’ darbiet fil-ġimgħa.

Il-Programm SkillUp Awareness joffri sessjonijiet informattivi bl-għan li jqajmu kuxjenza dwar id-diversi servizzi u opportunitajiet disponibbli permezz tal-Unit SkillUp. Dawn is-sessjonijiet huma mfassla biex jipprovdu lill-edukaturi, il-ġenituri u l-professjonisti għarfien siewi dwar ir-riżorsi u l-għażliet disponibbli għall-persuni b’diżabilita, u jiżguraw li jkunu infurmati aħjar dwar kif jassistu u jappoġġaw il-bżonnijiet tagħhom.

Min jista’ jibbenefika

• istituzzjonijiet edukattivi
• ġenituri / gwardjani / qraba
• professjonisti ta’ Aġenzija Sapport
• professjonisti ta’ entitajiet governattivi li jaħdmu fi settur privat
• għaqdiet mhux governattivi (NGOs)