Aġenzija Sapport tiffaċilita esperjenzi ta’ volontarjat ma’ persuni b’diżabilità. Il-voluntiera jistgħu jingħaqdu mas-servizz tal-Aġenzija – Sharing Lives – biex jagħtu ftit mill-ħin tagħhom biex joħolqu attivitajiet u jappoġġjaw lill-persuni b’diżabilità fil-komunità.
Il-voluntiera ta’ Sharing Lives jiġu minn kull qasam tal-ħajja – studenti, pensjonanti, membri ta’ organizzazzjonijiet volontarji oħra u individwi li jagħtu ftit mill-ħin tagħhom.
Aħna qegħdin infittxu volontiera kreattivi u b’passjoni li jixtiequ jittrasformaw il-passatempi jew l-interessi tagħhom f’attivitajiet sinifikanti għal oħrajn. Kemm jekk tħobb issajjar, il-krafts, il-mużika, l-isport jew xi ħaġa kompletament unika, int tista’ tgħin toħloq u tmexxi programm ġdid fejn membri u volontiera bħalek se jingħaqdu flimkien biex jitgħallmu, jagħmlu kuntatt soċjali u jieħdu gost.
Bl-assistenza tal-professjonisti tagħna, int se tmexxi grupp żgħir u se taqsam il-passjoni tiegħek f’ambjent li jilqgħek u inklużiv. Xejn mhuwa impossibbli – fil-passat kellna attivitajiet li jvarjaw minn tisjir, varjetà ta’ krafts kreattivi, sa rock climbing, u aħna dejjem inkunu eċitati li nesploraw ideat ġodda!
Biex jikseb esperjenza ta’ volontarjat
Biex jikseb firxa wiesgħa ta’ ħiliet li jinkludu ħiliet kreattivi, ħiliet organizzattivi, taħdit fil-pubbliku, żvilupp u implimentazzjoni ta’ proġetti, eċċ
Biex jingħata l-opportunità li jissuġġerixxi u jimplimenta l-ideat kreattivi tiegħu għal attivitajiet
Biex jesperjenza b’mod dirett is-sodisfazzjon li jista’ jikseb mill-kontribut tiegħu lejn l-inklużjoni tal-persuni b’diżabilità
Biex jiltaqa’ ma’ komunità ta’ voluntiera kemm lokali kif ukoll barranin
Biex jaqsam esperjenzi u kulturi differenti ma’ voluntiera/impjegati oħra
Il-voluntiera jingħataw sapport kontinwu u taħriġ u superviżjoni, u b’hekk jiġi żgurat ukoll li s-servizz offrut ikun tal-ogħla livell, u li jiġu ssalvagwardjati kemm il-persuni b’diżabilità kif ukoll il-voluntiera.
Il-voluntiera li jakkumulaw aktar minn 30 siegħa ta’ servizz sal-aħħar tal-esperjenza tagħhom jingħataw ċertifikat mill-Aġenzija. Hemm ukoll inċentivi oħra stabbiliti biex il-voluntiera jiġu appoġġjati fil-ħidma tagħhom mal-klijenti.
Is-servizz huwa wkoll appoġġjat u rreġistrat ma’ Degree Plus tal-Università ta’ Malta.
Wieħed jista’ jipparteċipa u jgħin fl-organizzazzjoni ta’ attivitajiet li jinvolvu persuni b’diżabilità f’kuntest ta’ grupp.
Attivitajiet jistgħu jkunu avveniment ta’ darba jew programm b’sensiela ta’ sessjonijiet.
Wieħed jista’ jaġixxi bħala kuntatt soċjali fejn il-voluntiera jitqabblu ma’ persuna b’diżabilità li jistgħu jagħmlu ħbieb magħha.
Jekk għandek xi mistoqsijiet fi kwalunkwe stadju, toqgħodx lura milli tikkuntattja lit-tim tagħna fuq sharinglives.sapport@gov.mt
Int tista’ tissottometti l-applikazzjoni tiegħek b’mod elettroniku jew tniżżel il-formola tal-applikazzjoni u tibgħatha permezz tal-email, personalment, jew bil-posta fuq l-indirizz ta’ hawn taħt.
Uħud mill-attivitajiet organizzati minn Sharing Lives u l-voluntiera mill-bidu tas-servizz fl-2017 jinkludu:
Sessjonijiet ta’ rugby
BBQs
Sajd
Trekking
Bowling
Pool parties
Rock climbing
Live-ins
Sessjonijiet tal-mużika
Sessjonijiet tal-arti
Sessjonijiet tal-litteriżmu diġitali
Sessjonijiet tal-fotografija
Attendenza għal kunċerti u avvenimenti nazzjonali bħal Rockestra, Isle of MTV u Military Tattoo
Safriet
Arti tal-ispettaklu
Safar u skambji iffinanzjati mill-UE
Programm fuq tisħiħ ta’ abilitajiet soċjali
Programm fuq abilitajiet ta’ tmexxija
Sessjonijiet ta’ tisjir
Persuni b’diżabilità li huma membri ta’ Sharing Lives jingħataw ukoll l-opportunità li jagħtu mill-ħin tagħhom, billi jkunu voluntiera huma stess. Attivitajiet bħal dawn jippermettu lill-klijenti jikkontribwixxu lejn is-soċjetà u fl-istess ħin ikunu parteċipanti attivi fis-soċjetà.
Permezz tas-servizz Sharing Lives, Aġenzija Sapport ingħatat Marka ta’ Kwalità mill-Korp Ewropew ta’ Solidarjetà, inizjattiva tal-Unjoni Ewropea li tippermetti liż-żgħażagħ juru solidarjetà mal-komunitajiet fil-pajjiż rispettiv tagħhom kif ukoll barra minn xtuthom.
Permezz ta’ dan il-premju, aktar voluntiera barranin se jkollhom l-opportunità jingħaqdu ma’ Sharing Lives bħala voluntiera.
Agħfas din il-ħolqa għal aktar informazzjoni dwar voluntiera ta’ Sharing Lives mill-Korp Ewropew ta’ Solidarjetà
Il-kollaboraturi ta’ Sharing Lives jinkludu entitajiet nongovernattivi, kumpaniji privati u istituzzjonijiet oħra fil-komunità. Dawn huma entitajiet lesti li jaqsmu r-riżorsi u d-disponibilità tagħhom biex jikkollaboraw ma’ Sharing Lives f’inizjattivi konġunti mmirati lejn il-persuni b’diżabilità li jużaw is-servizz ta’ Sharing Lives.
L-inizjattiva tista’ tkun avveniment ta’ darba jew programm ippjanat fuq numru ta’ sessjonijiet.
L-entitajiet interessati li jikkollaboraw ma’ Sharing Lives jistgħu jitolbu laqgħa ma’ membru tat-tim biex jiddiskutu l-idea proposta tagħhom jew biex joħolqu flimkien pjan dwar kif l-entità tagħhom tista’ tikkontribwixxi lejn Sharing Lives.
Sharing Lives
Indirizz: Aġenzija Sapport, Alert Buildings, Triq il-Kanun,
Qormi QRM 9030
Għal aktar informazzjoni dwar din l-iskema, wieħed għandu jibgħat email fuq sharinglives.sapport@gov.mt jew iċempel fuq (+356) 2256 8000 (Malta) jew (+356) 2156 9909 (Għawdex)
