Service Providers’ Monitoring Team

Is-Service Providers’ Monitoring Team fi ħdan Aġenzija Sapport hu responsabbli għall-implimentazzjoni u l-ġestjoni tal-kuntratti tas-Sħubijiet Pubbliċi-Soċjali (PSPs) bejn l-Entitajiet Nongovernattivi (NGO) u l-Ministeru għall-Inklużjoni u l-Volontarjat (MIV). Is-servizz hu mmirat lejn l-individwi b’diżabilità u l-familji tagħhom li jinsabu f’riskju ta’ eżawriment, jew f’sitwazzjonijiet ta’ emerġenza.

L-Aġenzija twettaq din ir-responsabilità primarjament permezz tal-monitoraġġ regolari tas-servizz tal-NGO u ta’ Respite u d-determinazzjoni tal-livell ta’ appoġġ li jingħata lill-klijenti li jibbenefikaw mill-ftehimiet tal-PSP. Minbarra l-monitoraġġ, l-Aġenzija Sapport tieħu ħsieb ukoll id-dħul ta’ klijenti ġodda, it-twettiq tal-assessjar, l-ipproċessar finanzjarju relatat mal-klijenti fir-residenzi NGO u servizzi oħra, bħal respite u Day Programmes.

Fil-preżent, is-Service Providers’ Monitoring Team  hu responsabbli għall-monitoraġġ ta’ 17-il kuntratt tal-PSP li minnhom 13 huma djar residenzjali, u 4 huma servizzi ta’ matul il-jum jew programmi ta’ respite.

1. Dar l-Arċipriet Degabriele
2. Dar Madre Tereża
3. Dar Nazareth
4. Dar il-Wens
5. Dar l-Abilità
6. Dar Merħba
7. Dar Arka
8. Dar il-Ġublew tal-Ħniena
9. Dar Madonna ta’ Pinu
10. Dar l-Akkwarell
11. Dar Pirotta
12. Dar Shalom
13. Dar Żerniq
14. Dar Bjorn (Ħal Qormi)
15. Dar Bjorn (Ħaż-Żebbuġ)
16. Dar il-Kaptan Respite Service
17. Dar il-Kaptan Day Programme
18. Malta Autism Centre​
19. Embrace Diversity

Is-Service Providers’ Monitoring Team huwa responsabbli wkoll għal kollaborazzjoni ma’ ĦILA Homes għal servizzi residenzjali u ta’ respite f’Casa Apap Bologna u Dar Santa Rosa l-Mosta u Casal Nouvo ġewwa Paola. L-Aġenzija hi responsabbli għat-tlestija tal-assessjar tal-klijenti u tieħu ħsieb l-għoti tas-servizz u l-verifika finanzjarja tas-servizzi pprovduti mis-Servizzi ta’ ĦILA.

Is-servizzi ta’ respite jistgħu jiġu deskritti bħala sostenn temporanju ppjanat jew ta’ emerġenza li jingħata lil dawk li jieħdu ħsieb tfal jew adulti b’diżabilità. Il-programmi ta’ respite joffru pawżi għall-mistrieħ ippjanati għal żmien qasir u limitat għall-familji/kuraturi tal-persuni b’diżabilità.

Il-benefiċċji tar-respite

Is-servizzi ta’ respite huma indispensabbli fil-ħajja ta’ individwu li jieħu ħsieb persuna b’diżabilità. Ir-respite ma jfissirx li l-kura li jagħti dan l-individwu qed tiġi ssostitwita iżda jfisser li huwa jkun jista’ jkompli jagħti l-kura neċessarja. Is-servizzi ta’ respite huma relatati ma’ bosta benefiċċji, fosthom:

• Jagħtu żmien ta’ pawża għall-mistrieħ lill-individwu li jieħu ħsieb persuna b’diżabilità sabiex ikun jista’ jagħmel attivitajiet oħra importanti u neċessarji fil-ħajja ta’ kuljum tiegħu, inkluż xi ħin għall-kura personali tiegħu
• Idewwmu l-placements fit-tul peress li s-servizzi ta’ respite jagħtu lil dawk li jieħdu ħsieb persuni b’diżabilità l-possibilità li jistrieħu u jirkupraw saħħithom
• L-istudji wrew li dawk li użaw is-servizzi ta’ respite kellhom livelli inqas ta’ stress bħala ġenituri u kienu aktar kapaċi jkampaw.
• Joffru esperjenza pożittiva lill-persuna b’diżabilità li qed tagħmel użu mir-respite. L-individwi fil-kura tar-respite jkollhom l-opportunità li jissoċjalizzaw u jagħmlu ħbieb ġodda.

Servizzi ta’ Respite f’Malta

Aġenzija Sapport għandha ftehim mas-servizz ta’ Ħila Respite., li toffri servizzi ta’ respite f’Casa Apap Bologna u Dar Santa Rosa ġewwa l-Mosta u f’Casal Nuovo ġewwa Raħal Ġdid.

L-individwi jistgħu jagħmlu użu wkoll mis-servizzi ta’ respite f’Dar il-Kaptan ġewwa l-Imtarfa u f’Dar Arka ġewwa Għajnsielem, Għawdex.

Il-minuri u l-adulti bejn l-età ta’ 3 u 59 sena b’diżabilità huma eliġibbli għas-servizzi ta’ respite.

Individwi interessati jistgħu japplikaw għar-respite billi jċemplu l-Helpline ta’ Aġenzija Sapport fuq il-Freephone 153 (jagħfsu ext. 5) jew fuq 2256 8000 u jsaqsu għat-team tas-Service Providers’ Monitoring li jieħu ħsieb talbiet għal respite.

Agħfas fuq din il-ħolqa għall-Mistoqsijiet Frekwenti (FAQs) dwar dan is-servizz