Skema għal Carers – Servizzi ta’ Monitoraġġ – Għajxien Indipendenti fil-Komunità (ICLM)

Is-servizz ta’ Monitoraġġ – Għajxien Indipendenti fil-Komunità (ICLM) fl-Aġenzija Sapport juża r-riżorsi tiegħu biex jagħti servizzi ta’ appoġġ u ta’ segwitu lill-persuni b’diżabilità u lill-familji tagħhom f’Malta u Għawdex li jibbenefikaw minn sussidju finanzjarju biex dawn jiksbu l-assistenza personali minn carer tal-għażla tagħhom. Dawn is-servizzi għandhom l-għan li jgħinu lill-persuna b’diżabilità tkun aktar indipendenti fil-komunità filwaqt li jiżguraw li dawn il-persuni jibqgħu jirċievu s-servizzi, li qegħdin hemm biex jaqdu l-bżonnijiet tagħhom.

It-tim tal-ICLM jimpenja ruħu biex jiżgura li l-klijenti qed jirċievu l-aktar assistenza ta’ benefiċċju għalihom u li qed jitwettaq id-dritt tagħhom għal kwalità tal-ħajja aħjar. Jagħti wkoll valur lid-dinjità, is-saħħa u l-bżonnijiet tal-persuna. Is-servizz jiġi ggwidat b’mod qawwi mill-iskop tiegħu li jikseb l-għanjiet mixtieqa tal-individwu.

It-tim li jirċievi d-dħul tal-każijiet ġodda jipproċessa l-każijiet kollha li jaslu minn servizzi prospettivi, il-familji u professjonisti oħra li jeħtieġu kwalunkwe servizz fl-Aġenzija. Il-każijiet kollha li jidħlu jiġu assessjati bir-reqqa mill-mexxejja tat-tim, li jidentifikaw liema servizz/i l-individwu jista’ jibbenifika minnu skont il-bżonnijiet, interessi u x-xewqat tal-individwu.

Wara dan l-assessjar, it-tim jikkoordina kif xieraq mal-professjonisti mid-dipartimenti tas-servizzi identifikati, u jwettaq pjanijiet ta’ azzjoni ta’ segwitu.

Jekk mill-assessjar ikun determinat li l-klijent ser jibbenifika mis-servizz tal-Independent Community Living, il-ħaddiem soċjali / professjonist jikteb rapport dettaljat fuq il-bżonn tal-klijent għall-iskema tal-ICL. Meta dan ir-rapport jiġi finalizzat, il-professjonist jassisti lill-klijent sabiex jippreżenta l-każ quddiem bord awtonomu. Il-każ preżentat jiġi evalwat mill-membri tal-bord u huma jiddeterminaw l-approvazzjoni.

Malli din it-talba tintlaqa’ u jibda s-servizz, it-tim tal-ICLM isegwi u jagħmel monitorġġ tal-każ. Id-dipartiment tal-Finanzi japprova u jipproċessa l-pagamenti ta’ kull xahar.

Agħfas fuq din il-ħolqa għall-Mistoqsijiet Frekwenti (FAQs) dwar dan is-servizz

Il-persuni b’diżabilità jiġu offruti pakkett finanzjarju li jagħtihom l-opportunità jagħżlu huma stess il-carer personali tagħhom biex joffri servizz ibbażat fuq il-kundizzjonijiet u l-kompiti miftiehma bejn il-klijent u Aġenzija Sapport. L-iskema Direct Payment għandha titqies bħala sussidju li jassisti lill-persuni b’diżabilità jimmaniġġjaw is-servizzi magħżula tagħhom.

Is-Servizzi permezz ta’ Direct Payment jistgħu jiġu aċċessati meta t-talbiet ikunu għal inqas minn 13-il siegħa fil-ġimgħa.

Kull talba għal servizzi ta’ aktar minn 13-il siegħa taqa’ taħt l-iskema Independent Community Living, jew il-Personal Assistance Fund jekk tkun għal aktar minn 30 siegħa, u tiġi approvata mis-Services Allocation Committee (SAC) jew mill-Bord tal-Personal Assistance Fund (Bord tal-PAF). 

L-iskema Independent Community Living (ICL), b’mod simili għal dik ta’ Direct Payment, hija pakkett finanzjarju offrut lill-persuni b’diżabilità biex dawn ikunu jistgħu jgħixu ħajja aktar indipendenti jew biex jingħataw aktar assistenza f’sitwazzjonijiet aktar serji. Il-pakkett jista’ jkopri s-servizzi offruti minn carer li tgħix mal-persuna b’diżabilità jew l-ammont ta’ sigħat li jaqbeż il-massimu offrut mid-Direct Payment (13-il siegħa fil-ġimgħa), biex jitħallas il-carer.

Jekk il-persuna titlob ammont li jaqbeż it-30 siegħa fil-ġimgħa, it-talba taqa’ taħt il-Personal Assistance Fund (PAF).

Il-Personal Assistance Fund (PAF) huwa mmirat b’mod prinċipali lejn carers li jgħixu mal-persuni b’diżabilità. Il-klijenti jirċievu pakkett finanzjarju kull xahar/kull sena bħala sussidju għall-ispejjeż tal-carer. Il-PAF jista’ jintuża minn adulti li ġew evalwati li għandhom bżonn aktar minn 30 siegħa fil-ġimgħa ta’ assistenza personali kontinwa.

Agħfas din il-ħolqa għal aktar informazzjoni dwar ir-riforma tal-assistenza personali.