Xi persuni b’diżabilità għandhom diżabilità konġenitali li għexu biha ħajjithom kollha. Oħrajn kisbu diżabilità b’modi oħra, bħal wara inċidenti trawmatiċi, dijanjosi ta’ mard kroniku, jew permezz ta’ inċidenti oħra li jbiddlu l-ħajja. Diżabilità li wieħed jikseb f’ħajtu tista’ tbiddel b’mod sinifikanti l-ħajja ta’ persuna, kemm fiżikament kif ukoll mentalment.
Għal ħafna, l-iżvillup ta’ diżabilità huwa akkumpanjat minn perjodu ta’ niket, u jista’ jqanqal ħafna emozzjonijiet intensi oħra bħal biża’, rabja, ansjetà, skumdità (kemm mentalment kif ukoll fiżikament), u sentimenti ta’ aljenazzjoni. Id-dipressjoni u l-PTSD (Post Traumatic Stress Disorder) ħafna drabi jakkumpanjaw dan l-akkwist ta’ diżabilità, b’ħafna nies jinnavigaw it-telf ta’ xi kapaċitajiet waqt li jitgħallmu jgħixu b’ oħrajn ġodda.
Għal ħafna nies li tiżviluppalhom diżabilità fil-ħajja, ifisser li jitilfu parti minn ġisimhom u/jew il-funzjonalità ta’ parti minn ġisimhom. Dan jista’ jkun flimkien mat-telf ta’ kumdità fiżika, saħħa, mobilità, spontanjetà, il-kapaċità li jipparteċipaw f’ċerti attivitajiet, aspetti partikolari tal-istili ta’ ħajja preċedenti tagħhom, privatezza, sens ta’ dinjità, sens ta’ kontroll, sens ta’ effikaċja, parti mill-indipendenza, ħbieb, opportunitajiet ta’ impjieg, stabilità finanzjarja, id-dehra tal-ġisem tagħhom, u s-sens tagħhom infushom b’mod ġenerali. Kif individwu jaġġusta ruħu għal diżabilità ġdida huwa marbut b’mod qawwi ma’ min kien qabel id-diżabilità, inkluż għal liema riżorsi soċjali, emozzjonali u finanzjarji għandu aċċess. Fil-fatt, min kienet il-persuna qabel ma kisbet d-diżabilità huwa marbut aktar mill-qrib mal-aġġustament milli mas-severità tal-indeboliment innifsu.