L-għan ta’ din l-iskema hu li toffri appoġġ u assistenza finanzjarja lill-persuni b’diżabilità u lill-familji tagħhom biex jixtru mezz ta’ trasport adattat għall-bżonnijiet tagħhom.
Formola tal-applikazzjoni għandha tiġi ppreżentata flimkien ma’:
- kopja tal-Karta Ewropea tad-Diżabilità
- kopja tal-liċenzja tas-sewqan
L-applikazzjoni għandha tiġi ppreżentata lil Aġenzija Sapport qabel ma tinxtara l-vettura.
Importanti:
- Huwa importanti li l-vettura ma tinxtarax u ma tiġix irreġistrata f’Malta qabel ma tgħaddi mill-proċess kollu u qabel ma tinħareġ ittra ta’ Approvazzjoni mill-Ministeru għall-Finanzi u x-Xogħol.
- Il-vettura li eventwalment tinxtara ma tridx tkun diġà rreġistrata f’Malta.
- Jekk il-vettura tkun ġiet irreġistrata qabel jew matul il-fażi tal-ipproċessar, l-applikazzjoni tingħalaq. Dan ifisser ukoll li l-applikant jista’ japplika biss għall-Eżenzjoni mil-Liċenzja tat-Triq fuq vettura rreġistrata.
- Barra minn hekk, jekk l-individwu jkun qed japplika għall-ewwel darba, jew jekk il-bżonnijiet għall-vettura tiegħu jkunu nbidlu mill-aħħar applikazzjoni, se jintalab jattendi laqgħa mal-Occupational Therapist biex isir assessjar.
Malli jitlestew id-dokumenti kollha, l-applikazzjoni tintbagħat lill-Ministeru għall-Finanzi u x-Xogħol għall-konsiderazzjoni tal-Bord. L-ittra ta’ deċiżjoni li tingħata l-eżenzjoni mill-ħlas tat-taxxa tar-reġistrazzjoni fuq il-vettura tinħareġ mill-Ministeru għall-Finanzi u x-Xogħol.
